10. Madêg ing pråjå Garbapitu, Prabu Kålå Wisnudéwå miyós ing pandhapi, dipún adhêp Nyai Tumênggúng Kalimantragsi lan pårå punggåwå.
Ngêntósi utusanipún kaliyan gandrúng gandrúng.
Bótên dangu Téjåmantri Såråhitå sowan, ngaturi uningå manawi Patíh Baudhêndhå pêjah madyaníng palagan, Singåmúrti sírnå lêbúr dalah pårå wadyå yakså sadåyå.
Prabu Kålå Wisnudéwå sakalangkúng ing dukanipún.
Ngêrigakên wadyåbålå kêbút dalah sagagamaníng prang.
Nuntên bidhal.
11. Madêg ing Kahyangan Junggríngsalåkå, Bathara Guru, Bathårå
Narådå, dipún sowani pårå Déwå ngarak pangantèn Bathårå Wisnu
lan Bathari Pratiwi.
Bótên dangu katungkå sowanipún Bagawan Késåwåsiddhi kaliyan
ingkang putrå putri, Éndhang Srisumêkar, lan matúr, manawi Bathårå
Wisnu sampún langkúng rumiyín kråmå antúk Éndhang Srisumêkar.
Bathårå Guru mangayubagyå, Bathårå Wisnu têtêp anggarwå
Éndhang Srisumêkar, ingkang ugi lajêng dipún sêbat Dèwi Sri,
dadós jodhonipún ingkang pinasthi.
Lan ugi Bathari Pratiwi têtêp dadós garwanipún, ingkang ing bénjing
kawêcå badhé nurúnakên putrå putri, nåmå Bambang Siti-jå (Bomå
nårå kåsurå), lan Dèwi Siti Sundari, garwanipún Radèn Abimanyu,
putrå Radèn Arjunå.
Sartå Bathårå Wisnu kadhawuhan têtêp angadhatón wóntên ing
Kahyangan Utåråsagårå inggíh Kahyangan Utåråswargå utawi
Swargå utårå, taman Sriwêdari kadhawuhan mutêr kapindhah
dhatêng Kahyangan Utåråswargå.
Bótên watawís dangu katungkå gêggríng njawi, pangamukipún Prabu
Kålå Wisnudéwå sawadyå balanipún.
Pårå Déwå sadåyå sami bidhal mêthúkakên prang.
Ing madyaníng paprangan, wadyå yakså mêngsah pårå Déwå.
Nangíng pårå Déwa sami kasóran sadåyå tandhíng kasaktèn kaliyan
Prabu Kålå Wisnudéwå.
Bathårå Wisnu ugi kasóran, lumajêng nyuwún tulúng dhatêng mårå
sêpuhipún, Bagawan Késåwåsiddhi.
Dipún sagahi, nanging Bathårå Wisnu kapuríh samadi ngêningakên
ciptå, margi Prabu Kålå Wisnudéwå punikå satuhu sakalangkúng
sakti bótên wóntên tandhingipún, kajawi namúng kaliyan Bagawan
Késåwåsiddhi.
Margi sadåyå punika badhé dadós trimúrti ingkang sajiwå kaliyan
Bathårå Wisnu.
Bagawan Késåwåsiddhi lajêng majêng prang mêngsah Prabu Kålå
Wisnudwå, wêkasan sakalihipún sampyúh sírnå, jiwanipún manjíng
dhatêng hangganipún Bathårå Wisnu.
Wadyå yakså Garbåpitu ngamúk punggúng bélå sirnaníng gústi,
dipun tadhahi pårå Déwå sadåyå.
Nyai Tumênggúng Kalimantragsi sawadyå pêjah sírnå lêbúr dipún
amúk Bathårå Bayu lan pårå Déwå, Tayungan.
12. Madêg ing Kahyangan Junggríngsalåkå, Bathara Guru, Bathårå
Narådå, pangantèn lan pårå Déwå sadåyå sami sukå sukå, langên
lénggót båwå.

Tancêp Kayón.

Prabu Kålå Wisnudéwå